ХАМАС тобы кепілге алған израильдік 21 жастағы ару видео үндеу жолдады (ВИДЕО)

ХАМАС тобы израильдік 21 жастағы Миа Шемді кепілге алған. Израиль мен Франция азаматтығы бар қыздың көмек сұраған бейнежазбасы тарады, деп хабарлайды Bugin.kz порталы Stan.kz ақпарат агенттігіне сілтеме беріп.

Ол электронды музыка фестивалінде ұсталып қалған.

Қыздың қолы жараланған. Газа секторындағы ауруханада оған үш сағаттық ота жасалды.

"Мені жақсы қарап жатыр, дәрі-дәрмек қабылдаудамын, бәрі жақсы, мені үйге мүмкіндігінше тезірек қайтарыңыздар, ата-анам мен бауырларыма жеткізуді сұраймын. Бізді мүмкіндігінше тезірек алып кетіңіздерші", – дейді қыз.

Израиль қорғаныс армиясы өткен аптада Шемнің ұрланғаны туралы хабарлап, қазір олармен байланыста екенін айтты.

Израиль билігі Газада 199 адам кепілде деп ойлады, ал ХАМАС-тың ресми өкілі Әбу-Убейда 200-ден 250-ге дейін израильдіктерді ұстап отырғандарын мәлімдеді, олардың жартысының қос азаматтығы бар.

Әбу-Убейда Газа секторындағы израильдік әуе шабуылдарынан кепілге алынған 22 адам қаза тапты деп қосты.

Сонымен қатар ХАМАС-тың саяси бюросының төрағасы Халед Машал кепілдегі тұтқындарды Израильдегі палестиналықтарға айырбастайтынын айтты. Оның айтуынша, Израильде 6000 тұтқын бар.